Боздиди ҳайати байниидоравии Русия аз АНМН
Ҳайати байниидоравии Русия бо иштироки Ҳамоҳангсози доимии СММ, Намояндаи доимии Барномаи рушди СММ дар Тоҷикистон Александр Зуев дар доираи сафари расмӣ ба Тоҷикистон аз Маркази миллии таълимии хадамоти кинологии Агентии назорати маводи нашъаовари назди Президенти Ҷумҳурии Тоҷикистон боздид намуданд.
Бино ба маълумоти шуъбаи робита бо ҷомеаи АНМН, Мақсади сафари ҳайат аз баҳодиҳии натиҷаҳои азхудкунии кӯмакҳо барои рушд, ки аз ҷониби сохторҳои СММ татбиқ шудаанд, инчунин муайян кардани рушди ҳамкориҳои минбаъда иборат мебошад.
Директори Агентӣ генерал-лейтенанти милитсия Р. Назаров дар бораи фаъолияти Агентӣ, сатҳи ҳамкориҳо бо мақомоти дахлдори ҳифзи ҳуқуқ дар самти мубориза бо муомилоти ғайриқонунии маводи нашъаовар, ба аъзоёни ҳайат нақл кард.Роҳбари АНМН ба меҳмонон маълумот дод, ки дар Маркази таълимии мазкур то имрӯз на танҳо кормандони мақомоти ҳифзи ҳуқуқи кишвар, балки кормандони зиддимухаддиротии Ҷумҳурии Қирғизистон ва Ҷумҳурии Исломии Афғонистон низ савияи дониш ва малакаи касбии худро такмил доданд.
Ҳамзамон, ҳайат бо сохтор ва фаъолияти Маркази кинологӣ, инчунин фаъолияти сагҳои хизматӣ дар ошкор намудани маводи нашъаовар шинос шуд.Директори АНМН инчунин қайд кард, ки дар айни замон сохторҳои гуногуни СММ ва кишварҳои маблағгузор пешниҳодро ҷиҳати дар Ҷумҳурии Тоҷикистон таъсис додани Маркази таълимӣ оид ба бозомӯзии кормандони сохторҳои зиддимухаддиротии ҶТ ва ҶИА мавриди омӯзиш қарор додаанд.
Роҳбари АНМН диққати иштирокчиёни ҳайатро ба ҳамкориҳои байни Федератсияи Россия ва Ҷумҳурии Тоҷикистон дар самти мубориза бо муомилоти ғайриқонунии маводи нашъаовар, алалхусус дар доираи Созишномаи баимзорасидаи соли гузашта миёни ХНММН ФР ва АНМН ҶТ равона намуд, ҳамзамон оид ба ҳиссаи ҶТ дар масъалаҳои мубориза бо мухаддирот дар минтаъқаи Осиёи Марказӣ муфассал нақл кард.
Дар анҷоми вохӯрӣ ҷонибҳо изҳори умедворӣ намуданд, ки ҳамкориҳои минбаъда дар доираи лоиҳа ва Барномаҳои СММ боз ҳам густариш хоҳанд ёфт.